Satyam Shivam Sundaram

sach kaa darpaN hee shiv-darshan
shiv se hee kuchh sundar upajaao
viSh se amRt banaa
shool se phool khilaa
jeevan ke har patajhaḌ ko
nav-vasant saa mahakaao

vasudhaa ke kaN-kaN tRN-tRN men
sooraj chandaa neelagagan men
nadiyaa parvat aur pavan men
koTi-koTi jan ke tan-man men
simaTee us viraaT shakti ko
man-mandir men sadaa basaao
shiv se hee kuchh sundar upajaao

kunThaaon men muskaan bharo
TooTee veeNaa men taan bharo
ban malay pavan kaa jhonkaa
TooTee saa(n)son men navapraaN bharo
kuchh palakon par bikhare motee chun
ghaavon kaa maraham ban jaao
shiv se hee kuchh sundar upajaao

pal-pal bahatee jeevan-dhaaraa
detee boo(n)d-boo(n)d ahasaas
rukanaa mat gati hee jeevan
simaTee hai saa(n)s-saa(n)s men aas
mat Doob niraashaa-tam men
aashaaon ko jeevan-deep banaao
shiv se hee kuchh sundar upajaao

kahataa teraa lakShy nirantar
baḌhataa jaa too apane path par
chintan men chaitany jagaakar
jeevan men kuchh to adbhut kar
path par kuchh pad-chihn banaakar
kaal-shilaa par kuchh likh jaao
shiv se hee kuchh sundar upajaao

Topic: