aaj ke bichhuḌe n jaane kab milenge?
aaj se do prem yogee, ab viyogee hee rahenge!
aaj ke bichhuḌe n jaane kab milenge?
saty ho yadi, kalp kee bhee kalpanaa kar, dheer baandhoo(n),
kintu kaise vyarth kee aashaa liye, yah yog saadhoo(n)!
jaanataa hoo(n), ab n ham tum mil sakenge!
aaj ke bichhuḌe n jaane kab milenge?
aayegaa madhumaas phir bhee, aayegee shyaamal ghaTaa ghir,
aa(n)kh bhar kar dekh lo ab, main n aaoo(n)gaa kabhee phir!
praaN tan se bichhuḌ kar kaise rahenge!
aaj ke bichhuḌe n jaane kab milenge?
ab n ronaa, vyarth hogaa, har ghaḌee aa(n)soo bahaanaa,
aaj se apane viyogee, hRday ko ha(n)sanaa sikhaanaa,
ab n ha(n)sane ke liye, ham tum milenge!
aaj ke bichhuḌe n jaane kab milenge?
aaj se ham tum ginenge ek hee nabh ke sitaare
door honge par sadaa ko, jyon nadee ke do kinaare
sindhutaT par bhee n do jo mil sakenge!
aaj ke bichhuḌe n jaane kab milenge?
taT nadee ke, bhagn ur ke, do vibhaagon ke sadRsh hain,
cheer jinako, vishv kee gati bah rahee hai, ve vivash hai!
aaj athaiti par n path men, mil sakenge!
aaj ke bichhuḌe n jaane kab milenge?
yadi mujhe us paar kaa bhee milan kaa vishvaas hotaa,
sach kahoo(n)gaa, n main asahaay yaa nirupaay hotaa,
kintu kyaa ab svapn men bhee mil sakenge?
aaj ke bichhuḌe n jaane kab milenge?
aaj tak huaa sach svapn, jisane svapn dekhaa?
kalpanaa ke mRdul kar se miTee kisakee bhaagyarekhaa?
ab kahaa(n) sambhav ki ham phir mil sakenge!
aaj ke bichhuḌe n jaane kab milenge?
aah! antim raat vah, baiThee raheen tum paas mere,
sheesh kaandhe par dhare, ghan kuntalon se gaat ghere,
kSheeN svar men kahaa thaa, "ab kab milenge?"
aaj ke bichhuḌe n jaane kab milenge?
"kab milenge", poochhtaa main, vishv se jab virah kaatar,
"kab milenge", goo(n)jate pratidhvanininaadit vyom saagar,
"kab milenge", prashn uttar "kab milenge"!
aaj ke bichhuḌe n jaane kab milenge?
-
Narendra Sharma
